image

Боғот туманида ота ўз фарзандининг қотилига айланди.

date_range03.11.2021, 16:34
Олтмиш ёшли Азамат Иброҳимов (исм-фамилиялар ўзгартирилган) муқаддам содир қилган жиноятлари учун бир неча бор суднинг қора курсисига ўтириб, жазоланган бўлсада, бундан ўзига тегишли хулоса чиқармасдан яна жиноят йўлига қадам қўйди.
Аввалига муқаддам содир қилган жиноий қилмишлари учун жазосини ўтаб келиб, оиласи билан тинч-осуда ҳаёт кечирарди. Бироқ, орадан кўп вақт ўтмай спиртли ичкилик ичишга ружу қўйди. Ичиб шовқин кўтариб ҳамманинг тинчлигини бузишга одатланди, атрофидагилар бу ҳолатдан безор бўлиб, ундан узоқлаша бошлашди. Кундалик жанжаллардан безиган кичик ўғил алоҳида уйга чиқиб кетди, энди отанинг хархашасини кўтариш катта ўғилга қолди. Катта ўғил ҳам отаси ичган кунлари бошқа қариндошлариникида тунарди.
Фожиа юз берган куни, яъни 2021 йил 8 май санасида кичик ўғилга акаси қўнғироқ қилиб, отаси яна ичиб олиб, хурмача қилиқларини бошлаганлигини, маҳалла фуқаролар йиғини раиси билан ҳам тинчлантира олишмаганини айтиб нолиган ва шу сабабли ўзи ҳам келиб, отасини уйга киритиб тинчлантиришда ёрдам сўраган.
Кун ботар пайт дўстининг машинасида уйига келган кичик ўғил ва ака бир амаллаб маст-аласт отасини уйига киргизиб, ётқизишди ва енгил тин олган ака укасига ўзи билан келган дўстининг машинасида кутиб туришини айтади ва отаси ухлаб қолганига ишонч ҳосил қилиши учун уйга қайтади.
Бироқ, ичкилик таъсирида ақли хиралашган ота ўғилларининг бу ҳаракатларини ҳақорат каби қабул қилиб, турли хаёллар таъсирида ошхонага кириб қўлига пичоқ олганлигини ўзи ҳам англамаган бўлса керак.
Ташқарида эса “отам тинчланди” деб ўйлаб эндигина кетмоқчи бўлиб турган катта ўғил, ногаҳон кўксига санчилган пичоқ ҳамда отасининг “сенга шу керакмиди, ўлсанг ўлиб кет” деган ҳайқириғидан карахт ҳолатга тушиб, кўксини чангаллаб қолади. Етказилган жароҳат шу даражада оғир эдики, уни зудлик билан туман Тиббиёт бирлашмасининг жонлантириш бўлимига ётқизилгани ҳам, тезкор муолажалар олиб борилгани ҳам сақлаб қола олмади,  ёш ва навқирон йигитнинг ҳаётига нуқта қўйилди.Албатта, бирорта жиноят жазосиз қолмайди. Жиноят ишлари бўйича Боғот туман суди Азамат Иброҳимовга 10 йилга озодликдан маҳрум этиш жазосини тайинлади.
 
Ҳикмат Саидов
жиноят ишлари бўйича Боғот туман судининг раиси