image

Хоразмдаги 2 кунлик оммавий қабулда 351 нафар фуқаронинг судга доир мурожаати эшитилди

date_range30.04.2022, 03:31
Вилоятнинг барча туманларини қамраб олган икки кунлик қабул жараёнида Судьялар олий кенгаши раиси Х. Ёдгоров ва Олий суд раисининг ўринбосарлари И. Муслимов, Б. Исаков томонидан 351 нафар фуқаронинг соҳага оид мурожаат ва муаммолари ўрганилди.Қабул қилинган фуқароларнинг 147 нафари жиноят ишлари бўйича, 124 нафари фуқаролик ишлари бўйича, 67 нафари маъмурий ишлар буйича ва 13 нафари иқтисодий ишлар буйича судларга оид мурожаатларни ташкил қилди.
Шундан 66 та мурожаат жойида ижобий ҳал этилди, 59 та ариза Олий суд томонидан кассация тартибида кўриш  учун қабул қилинди ва 205 та мурожаат бўйича ҳуқуқий тушунтиришлар берилди, 16 та кўрилаётган ишлар юзасидан ариза қабул қилинди ҳамда вилоят судига 1 та апелляция шикояти қабул қилинди.
Оммавий қабулда озодликни чеклаш билан боғлиқ бўлмаган жазони ўтаётган маҳкумлар жазони енгиллаштиришни сўраб мурожаат қилишди ва шу ернинг ўзида жиноят ишлари бўйича Шовот, Гурлан, Қўшкўпир, Янгибозор, Янгиариқ, Ҳазорасп, Урганч, Хива туманлари ва Урганч шаҳар судлари томонидан сайёр суд ўтказилиб жами 52 нафар шахс тегишли жазосини ўташдан муддатидан олдин шартли равишда озод қилинди.
Кам таъминланган ва вақтинча ишсиз бўлган 3 нафар фуқаронинг қабул давомида МЖтКнинг 315 моддаси тартибида берган аризаси қаноатлантирилиб, уларга нисбатан қўлланилган жарима миқдори камайтирилди.
Шунингдек, фуқаролик ишлари бўйича судлар томонидан 19 нафар шахсга нисбатан алимент ундириш юзасидан суд буйруғи чиқариллди, 19 нафар шахсга нисбатан юридик аҳамиятга эга бўлган фактларни белгилаш бўйича аризалар қаноатлантирилди.
14 нафар шахсга нисбатан қарз ундириш тўғрисидаги даъво аризалар қаноатлантирилди, ажрашиш ёқасига келиб қолган оилалар билан суҳбат ўтказилиб, 2 нафар вояга етмаган фарзанди бор 1 та оила яраштирилди.
Қабул давомида иқтисодий судлар томонидан 15 та ишлар суд мажлисларида кўрилиб, шундан тадбиркорлар фойдасига жами 68 млн. 170 минг сўмлик даъво талаблари қаноатлантирилди.
Қабулда муаммолари ҳал бўлган 4 нафар фуқаролар Ўзбекистон Республикаси Президенти номига ёзма ташаккурнома билдирди.