Хоразмда иссиқхоналар фаолияти ва озиқ-овқат экспортини ривожлантириш чоралари белгиланди

Хоразм вилоятида иссиқхона хўжаликлари фаолиятини яхшилаш, мева-сабзавот экспортини кўпайтириш ҳамда озиқ-овқат маҳсулотлари хавфсизлигини таъминлаш бўйича янги вазифалар белгиланди. Бу ҳақда вилоят ҳокимининг 2026-йил 6-октябрдаги 352-12-0-Ф/26-сон фармойишида қайд этилган.

Иссиқхоналар фаолияти назоратга олинади
Фармойишга мувофиқ, шаҳар ва туман ҳокимлари ўз ҳудудларидаги иссиқхона хўжаликлари фаолиятини яхшилаш, мавсум давомида экинлар экилишини таъминлаш ҳамда етиштирилган маҳсулотларни экспортга йўналтириш учун масъул этиб белгиланди.
Мазкур вазифалар вилоятда қишлоқ хўжалиги маҳсулотлари етиштириш имкониятларидан самарали фойдаланиш ва экспорт ҳажмини оширишга қаратилган.

Янгиариқдаги корхона фаолияти қўллаб-қувватланади
Фармойишда Янгиариқ туманида фаолият юритувчи “Глобал Фоод Импех” масъулияти чекланган жамияти қўшма корхонасига алоҳида эътибор қаратилган.
Янгиариқ тумани ҳокими З. Матназаров ҳамда “Асакабанк” акциядорлик жамияти Урганч банк хизматлари маркази раҳбари И. Джуманазаров корхона фаолиятини яхшилаш, юзага келаётган муаммоларни ҳал этиш ва мавжуд иш ўринларини сақлаб қолиш бўйича масъул этиб белгиланган.
Шунингдек, корхонанинг узлуксиз ишлашини таъминлаш мақсадида электр энергияси, табиий газ ва сув таъминоти билан боғлиқ масалаларни доимий назорат қилиш, эҳтимолий узилишларнинг олдини олиш чораларини кўриш топширилган.

Вилоят ҳокимлигига ҳар ой ахборот берилади
Белгиланган вазифалар ижроси доирасида Янгиариқ тумани ҳокими ва банк вакили корхона фаолиятини ривожлантириш бўйича амалга оширилган ишлар ҳамда мавжуд муаммоларни ҳал этиш ҳолати юзасидан ҳар ой якунида вилоят ҳокимлигига ахборот киритиб боради.
Фармойиш ижросини назорат қилиш Хоразм вилояти ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари А. Давлетов зиммасига юклатилган.

Ҳужжатдан кўзланган асосий мақсад — иссиқхона хўжаликларини ривожлантириш, маҳаллий маҳсулотлар экспортини ошириш ва ишлаб чиқариш корхоналарининг барқарор фаолият юритишини таъминлашдан иборат.