Огоҳлантиришсиз чиқариш: Хоразмда юзлаб оилалар ижтимоий ёрдамдан маҳрум бўлмоқда

Сўнгги ҳафталарда Хоразм вилоятининг турли туманларидан веб сайтимизга фуқаролардан бир хил мазмундаги мурожаатлар келмоқда: уларнинг ижтимоий реестрдаги рўйхатдан огоҳлантиришсиз чиқарилгани ва бунинг натижасида бола пули ҳамда бошқа моддий ёрдам турлари тўхтатилгани ҳақида.

Бу кимнинг жавобгарлиги?

Ижтимоий реестр — аҳолининг эҳтиёжманд қатламларини аниқлаш ва уларга давлат томонидан ёрдам кўрсатиш мақсадида жорий этилган электрон тизимдир. Ушбу реестрни юритиш ва ундаги маълумотларни янгилаш бевосита Ижтимоий ҳимоя миллий агентлиги ҳамда унинг ҳудудий бўлинмалари зиммасига юкланган.

Бироқ сўнгги ҳолатлар шуни кўрсатмоқдаки, айрим фуқаролар огоҳлантиришсиз ва сабаб кўрсатилмасдан реестрдан чиқарилмоқда. Бу эса қонунийлик масаласини кун тартибига олиб чиқмоқда.

Қонун нима дейди?

🔹 Ўзбекистон Республикаси Президентининг 2021-йил 3-августдаги ПҚ–5198-сон қарорига кўра, ижтимоий реестрга киритилган фуқароларнинг ҳолати ҳар чоракда автоматик янгиланади.
🔹 Аммо фуқарони рўйхатдан чиқариш учун асос бўладиган ҳолатлар (масалан, даромад манбаининг пайдо бўлиши, мол-мулк ортиши ва ҳ.к.) тасдиқланган ҳужжатлар билан расмийлаштирилиши лозим.
🔹 Энг муҳими: фуқаро реестрдан чиқарилиши ҳақида ёзма ёки электрон тарзда огоҳлантирилиши керак.

Агар бундай огоҳлантиришлар берилмаяпти, бу ҳолат қонунбузарлик сифатида баҳоланиши мумкин.

Бу — бола пулисиз қолаётган оилалар учун оғриқли масала

Ижтимоий реестрдан чиқарилган фуқаролар бир зумда нафақа, бола пули, моддий ёрдам ва бошқа имтиёзлардан маҳрум бўлмоқда. Айниқса, бу ҳолат кўп фарзандли ёки ёлғиз она бўлган оилалар учун жуда оғир оқибатларга олиб келиши мумкин. Электр, газ, ижара тўловлари, мактабдаги харажатлар — буларнинг барчасини аввал ижтимоий ёрдам билан қоплаб келган фуқаролар энди жиддий молиявий қийинчиликка юз тутишлари мумкин

Фуқаролар нима қилиши керак?

Агар сиз ёки яқинларингиз ушбу муаммога дуч келсангиз, қуйидаги амалларни бажаришингиз тавсия этилади:

1. my.gov.uz ёки ijtimoiyhimoya.uz портали орқали ўз статусингизни текширинг.
2. Маҳалла фуқаролар йиғинига ёки ҳудудингиздаги Ижтимоий хизматлар марказига мурожаат қилинг.
3. Агар сизга асосли тушунтириш берилмаса, Адлия вазирлиги, халқ қабулхонаси, pm.gov.uz манзили орқали шикоят йўлланг.
4. Маҳаллий Кенгаш депутатларига ушбу муаммоингиз ҳақида мурожаат қилинг.

Якуний сўз

Фуқароларнинг ҳаёт-мамотига таъсир қилувчи ижтимоий ёрдам каби масалаларда ҳар қандай ўзгариш — айниқса, реестрдан чиқариш — фақат қонун асосида ва шаффоф амалга оширилиши керак. Бугун Хоразмда юз бераётган ушбу ҳолатлар эса давлат томонидан ёрдамга муҳтож оилалар эсдан чиқарилаётгандек тасаввур пайдо қилиши мумкин.

Фаррухбек Каримов