image

Хоразмлик эркакга 29 марта пичоқ санчиб ўлдирган Қашқадарёлик аёл 10 йилга қамалди.

date_range30.05.2023, 12:54

Жиноят ишлари бўйича Янгиариқ туман судида 1987 йилда Қашқадарё вилоятида туғилган, маълумоти олий, оиласидан ажрашган ва бир нафар фарзанднинг онаси М.Б.га нисбатан ЖКнинг 97-моддаси 2-қисми “в,ж” бандлари билан жиноят иши кўриб чиқилди.

Судда маълум бўлишича, М.Б. хоразмлик Б.Б. билан шаръий никоҳ асосида яшаб келган. Эрининг қарзи, хотини номига олинган кредитлар натижасида оиланинг тез-тез тинчлиги бузилиб, кунора жанжаллар бўлиб турган. Шу каби жанжаллардан бирида эри шаръий никоҳида бўлган рафиқасига кредитларни қандай иш қилиб бўлса ҳам тўлашини айтади. Бу воқеалардан кейин аёл жаҳл устида эрини ўлдириш режасини тузиб, жиноят содир бўлишидан бир кун олдин ошхона пичоғини сотиб олган. 

Жиноят содир бўлган куни М.Б. олдиндан ётоқхонасида яшириб қўйган ошхона пичоғини олиб ухлаб ётган Б.Б.га 3 маротаба санчади ва эри туриб, қаршилик кўрсатишига қарамасдан яна 26 маротаба пичоқ уриб, уни қасддан ўлдирган.

Шунингдек, суд мажлисида М.Б.нинг жиноий хатти-ҳаракатлари ва марҳумнинг вафот этиш сабаблари 12-,131-,176-,175-,178-сонли суд-тиббий ва биологик экспертиза хулосалари ҳамда бошқа далиллар билан исботланди.

Суд мажлисида М.Б. содир этган жиноий қилмишига тўла иқрорлиги ва чин кўнгилдан пушаймонлиги, қарамоғида вояга етмаган фарзанди борлигини инобатга олиб, суддан енгиллик қилишни сўради.

Суд, судланувчига нисбатан жазо тайинлашда, содир этилган жиноятнинг оғирлик даражасини, ижтимоий хавфлилик хусусиятини, шунингдек, жиноят жабрланувчи-марҳумнинг унга нисбатан олдиндан содир этиб келган ғайриҳуқуқий ҳаракатлари натижасида юз берганлигини эътиборга олиб, аёлнинг жазосини енгиллаштирувчи ҳолат деб, унинг айбига чин кўнгилдан иқрор бўлиб, пушаймонлик билдирганлигини, муқаддам судланмаганлигини, қарамоғида бир нафар вояга етмаган фарзанди бўлиб, ёлғиз она эканлигини инобатга олиб жазо тайинлашни лозим топди.

Суд ҳукмига кўра М.Б.  ЖК 97-моддаси 2-қисмининг “в,ж” бандларида назарда тутилган жиноятни содир қилганликда айбли деб топилиб, ЖКнинг 57-моддасини қўллаб, 10 йил муддатга озодликдан маҳрум қилиш жазоси тайинланди. Жазони умумий тартибли колонияларда ўташлик белгиланди.