Хоразмда чойхонадаги жанжал қотиллик билан якунланди: 21 ёшли йигит 16 йилга қамалди

Хонқа туманида онасининг танишлари билан юзага келган можаро оқибатида 1 кишини ўлдирган 21 ёшли йигит 16 йилга озодликдан маҳрум қилинди. Бу ҳақда “Дарё” нашри суд ҳужжатларига таяниб хабар берди.

Можаро кечки қўнғироқ сабаб бошланган

Суд ҳужжатларига кўра, воқеа 2026-йил 9-апрел куни юз берган. Тахминан соат 21:00 да бир эркак синфдошига қўнғироқ қилиб, бошқа синфдош қизларни ҳам йиғиб, чойхонага келишини сўраган.

Бу суҳбатни эшитган аёлнинг ўғли жаҳли чиқиб, телефонни онасининг қўлидан олган ва қўнғироқ қилган эркак билан тортишиб қолган. Йигитнинг кўрсатмасига кўра, суҳбат давомида томонлар бир-бирини ҳақорат қилган.

Шундан сўнг йигит отаси билан бирга айтилган чойхонага борган. У ерда юзага келган жанжал вақтида йигит ва қўнғироқ қилган эркак ўртасида олишув содир бўлган. Кейинчалик йигит отасини уйига олиб кетган.

Йигит пичоқ билан яна қайтган

Можаро шу билан тугамаган. Йигит яна чойхонага боришга қарор қилган ва тахминан соат 22:00 атрофида маҳалладаги дўкондан қарзга ошхона пичоғини олган.

У чойхонага қайтиб, аввалги жанжалда қатнашган эркакни ташқарига чақирган. Шу пайтда уларнинг таниши жанжални тўхтатиш ва 2 кишини ажратишга уринган.

Бироқ тортишув давом этган. Судланувчининг кўрсатмасига кўра, эркак унинг ва ота-онасининг шаънига ҳақоратли сўзлар айтган. Шундан сўнг йигит қўлидаги пичоқ билан унинг кўкрагига зарба берган.

Жабрланувчи воқеа жойида вафот этган. Кейин йигит аввалги можаро иштирокчисига ҳам пичоқ билан зарба берган. У енгил тан жароҳати олган ва тирик қолган.

Суд қандай ҳукм чиқарди?

Судда йигит пичоқни ўзини ҳимоя қилиш мақсадида олганини, ҳеч кимни ўлдириш нияти бўлмаганини билдирган.

Бироқ Жиноят ишлари бўйича Боғот туман суди уни Ўзбекистон Республикаси Жиноят кодексининг қасддан одам ўлдириш ҳамда қасддан одам ўлдиришга суиқасд қилиш билан боғлиқ моддаларида назарда тутилган жиноятларни содир этишда айбдор деб топган.

Суд ҳукмига кўра, унга узил-кесил 16 йил муддатга озодликдан маҳрум қилиш жазоси тайинланган.

Манба: Daryo.